ეს დალოცვილი კაკალი
კაკლის ფოთლებისა და წენგოს ნახარშს ხალხურ მედიცინაში ხმარობენ კუჭისა და გინეკოლოგიური დაავადებების, თირკმლები, საშარდე ბუშტის, სტომატიტისა და ანგინის სამკურნალოდ.
კაკლის წენგოსგან მზადდებოდა ტუბერკულოზის სამკურნალო პრეპარატი „იუგლონი“. ქართულ ხალხურ მედიცინაში ეგზემის წინააღმდეგ წარმატებით იყენებენ წენგოსა და ჩვილ მწვანე ნაყოფს: მას ჭრიან და უსვამენ დაავადებულ ადგილებზე.
კაკლის ზეთი იხმარება კონიუნქტივიტისა და შუა ყურის ანთების სამკურნალოდ, ხოლო წენგოს ფხვნილი – ჭრილობიდან სისხლდენის შესაჩერებლად.
იაპონიის ერთ-ერთი ფირმა კაკლის დაფხვნილ ნაჭუჭს იყენებს სამუხრუჭე მასალის წარმოებაში. ნაჭუჭი გამოიყენება აგრეთვე ლინოლეუმის, სალესი ქვისა და ტოლის წარმოებაში, ხმარობენ დინამიტის დასამზადებლადაც. გარდა ამისა, ნაჭუჭისგან მიიღება გააქტიურებული ნახშირი და, როგორც ფოსფორის, კალიუმისა და კალციუმის შემცველს, დაფქული სახით იყენებენ სასუქადაც.
კუჭ-ნაწლავის ტკივილის საწინააღმდეგოდ და საჭმლის მონელების გასაუმჯობესებლად ამზადებენ ნაყენს: დაახლოებით 30 ცალ კაკლის ჩვილ ნაყოფს ასხამენ 1ლ სპირტს და მზეზე დგამენ 14 დღის განმავლობაში. შავ სურნელოვან ნაყენს გადაასხამენ სხვა ჭურჭელში, ძირში დარჩენილ კაკალს აყრიან შაქარს, კარგად აურევენ და 1 თვის განმავლობაში ტოვებენ, მიიღება საოცარი გემოს ლიქიორი. ნაყენიც და ლიქიორიც ერთი და იმავე დანიშნულებისაა.
თმისათვის მუქი ფერის მისაცემად თავს კაკლის ფოთლების მუქი ნახარშით იბანენ.
წყლულებისა და ჭრილობების სამკურნალოდ ძალიან ეფექტური მალამოს მოსამზადებლად დაფქულ კაკლის ფოთლებს შეურევენ მზესუმზირის ზეთში გამდნარ თაფლის სანთელს.
კაკლის ხის გულგული მსოფლიოში ერთ-ერთ საუკეთესო მასალად ითვლება ავეჯის წარმოებაში.
წყარო: ნიკოლოზ იოსებიძე, ყველაფერი საოჯახო მეურნეობის შესახებ (გამომცემლობა პალიტრა L)
